Nagpakdaar dagiti otoridad iti publiko iti pannakipaset kadagiti “task scams” a maipatulod babaen kadagiti messaging application nu sadinno, dagiti biktima ket maikkan ti assignment a kasukat ti kuarta sakbay a makombinsir nga ag-invest iti kuartada a subad ti napartak a ganansia.
Babaen kadagiti nadawat a mensahe usar dagiti messaging applications, dagiti tattao a mangiyam-ammo iti bagida kas kameng ti digital marketing agency ket mangi-offer iti “work from anywhere” a gundaway.
Maallukoy dagiti biktima babaen ti pananggun-odda iti agingga iti P9,000 iti tunggal aldaw babaen laeng ti panangi-click iti “likes” kadagiti produkto iti nagduduma a shopping applications.
Sigun iti Presidential Anti-Organized Crime Commission (PAOCC), dagiti task scams ti mangallukoy kadagiti biktima babaen ti panangikarida a makaurnong ti nalaka a kuarta.
Patien ti nasao nga ahensia nga agusar dagiti sindikato kadagiti nalaka a mangtiliw wenno alikamen nga addaan iti kabaelan a makastrek kadagiti numero ti telepono, mensahe ken datos manipud kadagiti smartphone dagiti mabalin a biktima.
Iti agdama, agtultuloy ti panangimbestigar ti Presidential Anti-Organized Crime Commission (PAOCC) iti nasao nga scam a mapapati nga imanmanehar dagiti Pilipino.
