Maysa a parikut para iti panakaipatungpal ti kaskenan nga aksyon kadagiti insidente nga adda pakainaiganna iti nakauy-uy a kable ti panangireport dagiti maseknan nga indibidwal kadagitoy iti maseknan nga opisina.
Iti panakaiuman ti Bombo Radyo kenni Darryl Kim Longid,dadaulo ti Public Order and Safety Division(POSD),inlawlawagna a regular ti panangisimpada kadagiti makitada ken maireport kadakuada a nakauy-oy a kable kadagiti kalsada.
Innayonna nga adda dagiti nabukel a grupo dagiti indibidwal manipod Public Order and Safety Division(POSD), telecommunication companies, Benguet Electric Cooperative(BENECO), ken dadduma pay nga opisina nga adda pakainaiganna iti panangmintinir iti kasasaad dagiti kable para iti naparpartak a panagresponde dagitoy.
Gapu iti dayta, maipalpalagip iti publiko nga ireportda iti barangay, iti Public Order and Safety Division(POSD) ken iti istasyon ti pulisya nga addaan jurisdiction iti barangay dagitoy apaman nga adda makitada a nakauy-uy a kable a mabalin a mangitunda ti aksidente.//Bombo Jez Lapizar
