BAGUIO CITY – Nagnegatibo iti COVID-19 ti maysa a babae a non-uniformed personnel (NUP) ti Benguet Police Provincial Office (PPO) nga immunan a naipasidong iti self-quarantine.
Iti interview ti Bombo Radyo Baguio kenni PMaj. Carolina Lacuata, panakangiwat ti Police Regional Office Cordillera, kinunana a ti nasao nga NUP ket nagtaud sadiay Japan ken idi nakaawid ditoy pagilian ket naipasidong iti 14-day self-quarantine.
Dinakamatna nga idi napalabas a lawas ket nakarikna iti panagsakit iti ulo ti NUP isut gapuna a nagpataming iti Regional Health Service ken naipasidong iti test para iti COVID-19.
Innayonna nga idi kalman ket naawatda ti resulta ti test ken nailanad ditoy a negatibo iti coronavirus ti nasao nga NUP.
Pinaglibakan metlaeng ni PMaj. Lacuata ti damag a nag-lockdown ti Camp Bado Dangwa a regional headquarters ti pulis iti Cordillera gapu iti pangta ti COVID-19.
Kinunana a nakalukat latta ti Camp Dangwa kadagiti kliyente ti pulisya nupay adda ti maipatpatungpal a precautionary measure kas iti nainget a check-up iti mismo a gate ti kampo babaen iti panaka-ala ti temperatura dagiti sumrek sadiay.
Kabayatanna, dinakamat pay ni PMaj. Lacuata a kas panagannad ti pulisya iti COVID-19 ket nakanselar amin a mandatory courses dagiti pulis ken nabilin dagiti amin nga unit ken isyasyon ti pulisya iti rehiyon iti nainget a panangsurot dagitoy kadagiti pagalagadan iti kinadalus ti indibidual ken ti aglawlaw dagitoy.
Kinunana a naibilin a nasken nga amin a comfort room dagiti istasyon ken opisina ti pulisya ket addaan ti alcohol ken sanitizers malaksid pay iti panangpapigsa dagiti uniformed ken non-uniformed personnel iti immune system dagitoy.