BAGUIO CITY – Nakasaganan ti pulis manipud Benguet iti panagsublina iti lubong ti mix martial arts (MMA).
Sigun kenni PO1 Crisanto ‘The Slugger’ Pitpitunge, excitement ken pressure ti marikriknana iti naituding a labanna iti Brave Combat Federation 10 sadiay Amman, Jordan inton March 2, aldaw ti Biyernes.
Kinunana nga iti panagsublina iti MMA ket adu a suporta ti maaw-awatna a nakanayon iti pressure a marikriknana iti nasao a laban.
Iti baet daytoy, magagaran met ti pulis iti panagsublina iti international MMA competition kalpasan ti nasurok makatawen a panag-inanana iti nasao nga ay-ayam.
Kinunana a gapu iti daytoy ket nainget ti nagbalin a panagsaganana nangruna iti ground game para iti umadani a labanda kenni Jordanian decorated striker ken Brave veteran Jalal Al Daaja.
Innayon ni Pitpitunge a saan unay a marigatan daytoy iti panagsublina iti MMA gaputa iti panagserbina iti Provincial Mobile Force Company ti Ifugao PNP ket nagtultuloy dagiti panagsanayna a nakatulong kenkuana.
Nagyaman pay daytoy kadagiti senior officials ti Ifugao PNP ken ti Cordillera PNP gapu iti suporta nga ipapaayda kenkuana.
Kabayatanna, inkarina nga ituloyna a mangipaay ti inspirasyon kadagiti kakailyan nangruna dagiti ubbing wenno agtutubo.
Sigun kenkuana, simrek daytoy iti nasao nga ay-ayam gapu iti kinarigat ti biag agingga a nagbalin a passion-na daytoy ken inaramatna ti combat sports tapno maka-ala ti scholarship ken agturpos iti kurso a pinilina iti kolehiyo.
Tarigagayna met a maipakita kadagiti dadduma a kakailyan nangruna dagiti ubbing a saan a lapped ti rigat iti biag tapno maragpat ti arapaap iti biag.
Naamun a nagserbi ni Pitpitunge kas inspirasyon kadagiti kakaduana iti Team Lakay a kas kada Stephen Loman a maysa itan a licensed criminologist ken agdama a Brave Combat Federation Batamweight Champion ken ni Team Lakay up-and-comer Jeremy Pacatiw.
Naragsakan met ti pulis iti panagbalinna nga inspirasyon kadagiti sumarsaruno a henerasyon ken dagiti kakaduana iti Team Lakay kagiddan ti panangkunana a daytoy ti rason tapno papintasenna pay ti panagay-ayamna iti MMA.
Maipalagip a ni PO1 Pitpitunge ket sigud a PXC Bantamweight Champion ken addaan iti addaan ti record a 9 wins, 5 losses ken iti agdama ket agserserbi daytoy iti Provincial Mobile Force Company ti Ifugao PNP.
Naituding a labanenna iti octagon ni Jordanian decorated striker ken Brave veteran Jalal Al Daaja iti Brave Combat Federation 10 sadiay Amman, Jordan inton March 2, aldaw ti Biyernes.
