BAGUIO CITY – Al-allukuyen ni PO2 Dangwa Bentres dagiti padana a pulis ken dagiti sibilian a naissem iti sports nga ituloyda ti agensayo tapno ad-adda pay a pumintas ti performance dagitoy.
Nakastrek daytoy iti qualifying event ti 41st National Milo Marathon a naangay sadiay Pasay City idi Hulyo 30.
Iti pannakipatang ti Bombo Radyo Baguio ken ni Bentres, kinunana a masapul laeng nga ibalanse dagiti sports enthusiasts dagiti oras dagitoy para iti trabaho ken ensayo kas iti ar-aramidenna.
Kinunana nga itultuloyna a pasayaaten ti performance-na iti marathon tapno mapaneknekanna a malaksid iti panangipaay dagiti pulis iti naimpusuan a serbisio iti publiko ket talentado ken nalalaingda iti sports.
Naituding a makisalip ni Bentres iti national finals ti pataray a maangay sadiay Cebu inton Disiembre ti agdama a tawen kalpasan ti panakakualipikarna iti daytoy.
Ni P02 Bentres ket tubo ti Burgos, La Union ken innem a tawenen nga agserserbi iti Baguio City Police Office Station 8.
