BAGUIO CITY – Natalgeden ti kasasaad ti maysa a pulis a napaltogan kasaruno ti panagrespondeda iti naiyuman kadakuada a maatap a kaso ti panagbugbog iti maysa a balay-paginoman sadiay Abatan, Buguias, Benguet idi parbangaon.
Nabigbig ti biktima a ni PO3 Jake Dati Guinadan, addaan iti legal nga edad ken miembro ti Buguias Municipal Police Station bayat a ti suspek ket ni Jonnie Ian Panganiban Ballo, 27, ken residente ti Abatan, Buguias, Benguet.
Maibasar iti inisyal nga imbestigasyon, nagturong iti kuerpo ti Buguias PNP ti maysa a lalaki ken nagkiddaw iti tulong kalpasan ti maatap a panangbugbog ken panangitutok ti suspek iti paltog kenkuana.
Dagus a nagresponde dagiti pulis iti nasao a lugar ken nadanonanda ti nakarikep a bar.
Idi agtuktok dagiti pulis iti ruwangan ket nagpaputok ti suspek ken natamaan ti kannigid a takyag ni PO3 Guinadan.
Kalpasan ti panakinegosasyon dagiti pulis ket inlukat ti suspek ti ridaw ken insukona ti paltogna a caliber 38 revolver nga addaan iti lima a basyo ken maysa a bala.
Naiturong ni PO3 Guinadan iti Northern Benguet District Hospital sadiay Buyacaoan, Buguias, Benguet para iti panakatamingna bayat a maisagsagana metten ti kaso kontra iti nasao a suspek.
