BAGUIO CITY – Imbandera ti pulis a tubo ti Baguio ti Philippine Flag kalpasan a naileppasna ti maysa kadagiti karigatan nga International Marathon Competition a naangay sadiay France.
Iti panakipatang ti Bombo Radyo News Team kenni PO3 Miguel Carranza, idi kanikadua ket nalpas daytoy ti 170 kilometer marathon race manipud France-Italy-Switzerland ken pasubli sadiay France.
Kinunana a dakkel ti nagbalin nga adjustment daytoy iti nasao a kompetisyon nangruna iti temperatura a dimmanon iti negative 15, ti sasaaden ti panawen ken ti yelo a mapaspasaran kabayatan ti nasao a marathon.
Ni PO3 Carranza ti maika-471 a nakaileppas iti nasao a pataray manipud iti pakabuklan a bilang dagitoy a 2,531 bayat a sumagmamano a partisipante ti saan a nakaileppas iti nasao a kompetisyon.
Naituding nga agsubli ditoy pagilian ni PO3 Carranza a nakadestino sadiay Burgos La Union intun September 6.
Maipalagip nga immunan a kinunana a ti panakipasetna iti nasao a kompetisyon ket tapnu mapunas ti negatibo nga imahe ti pulisya nangruna dagiti nagduduma a kontrobersiya a sangsangoen dagitoy.
Kabayatanna, kinuna met ni Roland Wangwang, ti kaunaan nga Igorot a nakaileppas iti nasao a marathon idi tawen 2015, a narigat ti nasao a kompetisyon gaputa adda ti naituding nga oras tapno maileppas daytoy.
Kinunana nangangato metlaeng dagiti bambantay a sang-aten dagitoy, ken kasapulanda ti ag-adjust iti angin ken iti panawen.
