BAGUIO CITY – Umap-apela iti suporta ken pinansial a tulong ti pulis a runner a tubo ti siudad ti Baguio para iti panangibagina iti Pilipinas ken iti Philippine National Police iti maysa kadagiti karigatan nga International Trail Running Competition a maangay sadiay France.
Sigun kenni PO3 Miguelito Carranza, agkasapulan daytoy iti P200,000 para iti panakipasetna iti International Trail Running Competition inton August 26 agingga September 3.
Nupay addan dagiti nangipaayen iti tulong kenkuana, inaklonna nga agingga ita ket dakkel paylaeng ti kurang iti nasao a gatad para iti nasao a kompetisyon.
Impettengna met nga iti baet daytoy ket saan latta a mapukpukawan ti namnama kagiddan ti agtultuloy a panakipasetna iti nagduduma a marathon iti lokalidad nga agserserbi a panagsanayna.
Naamuan nga agtaray daytoy iti 170 kilometers manipud France paturong sadiay Italy, Switzerland ken agsubli manen sadiay France.
Innayonna a babaen iti kompetisyon a pakipasetanna ket maisublina ti napintas nga image ti pulisya iti baet ti isyu a sangsangwen ti PNP ita.
Ni PO3 Carranza ti maikadua a Cordilleran runner a makipaset iti nasao a pasalip kalpasan ni Ronald Wangwang ti Bontoc, Mt. Province idi napalabas a tawen.
