BAGUIO CITY – Agserserbi a karit para kenni PO3 Miguelito Carranza ti isyu a sangsangwen ita ti Philippine National Police iti panakaipaset daytoy iti maysa nga International Trail Running Competition sadiay France.
Sigun kenkuana, tarigagayna a maipaayan iti napintas nga imahe ti pulisya iti sangsangwen dagitoy nga isyu.
Kinunana a saan nga amin a pulis ket “scalawag” ken adda latta met dagiti mapagtalkan a kameng dagitoy.
Inaklonna nga adda ti epekto ti sangsangwen dagitoy nga isyu iti karera daytoy iti isports gaputa adda latta dagiti maaw-awatna a negatibo a komento ken pammabalaw iti panakipasetda iti maysa kadagiti kadakelan a trail running competition.
Iti baet dagitoy nga isyu ken pammabalaw ket kinunana a nakatutok latta daytoy iti panggepna a mangibagi iti PNP ken iti pagilian.
Ni PO3 Carranza ket tubo ti syudad ti Baguio ngem nakadestino daytoy sadiay Burgos, La Union ken daytoy ti maikadua a Cordilleran runner nga agtaray iti 170 kilometer Ultra Trail du Mont Blanc sadiay Farance intun Agosto 28 agingga Setyembre 3.
Immunan a nakipaset iti kapada a kompetisyon ti tubo ti Bontoc, Mt. Province a ni Ronald Wangwang idi napalabas a tawen.
