BAGUIO CITY – Pimmusay ti maysa nga indibidual bayat a nadangran ti 15 a dadduma pay kalpasan a naaksidente ti maysa a parapasahero a jeep sadiay Kadaclan Village, Apugan-Loakan, siudad ti Baguio idi agsapa kalman.
Nabigbig ti driver ti nasao a jeep a ni Paul John Segundo Quioas, 39-anyos, naasawaan, residente ti Purok 3, Happy Hallow, Baguio City bayat a ti plaka ti lugan ket AYM 521.
Maibasar iti report, pasang-at ti nasao a jeep iti kalsada iti Kadaclan Village ken agturong daytoyiti Loacan Road idi killaat a simmardeng ti makina.
Gapu iti daytoy, immatras ti jeep agingga a naidungpar iti maysa a pagtagilakuan.
Nagresulta daytoy iti panakadangran ti 16 a pasahero, pakairamanan ti driver a dagus a naitaray iti pagagasan ken ti agtagikua iti nadungpar a pagtagilakuan.
Nupay kasta, naideklara a dead on arrival ti biktima a ni Angela Mendoza, 60-anyos ken residente ti Purok 4, Happy Hallow.
Nakaruar metten manipud iti pagagasan dagiti nadangran a biktima.
Naipila metten ti kaso a recless imprudence resulting in homicide and multiple injury ken damage to property ti nasao a driver.
