Pungtot ti narikna dagiti miembro iti workers union a Kilusang Mayo Uno-Cordillera kalpasan a saan nga inaprubaran ti Senado ti kanayonan a PhP200 a sweldo dagiti mangmangged iti pribado a sektor nga immunan nga inaprubaran iti Kamara idi June 4.
Iti panakiuman iti Bombo Radyo kenni Mike Cabangon, dadaulo iti nasao nga independent labor center,arigna bola iti basketball a naidribble ti matartarigagayan a panakaipangato iti sweldo gapu ta daytoy ket kasapulan a maipila manen iti sumaruno a kongreso.
Patien ni Cabangon a saan nga agserserbi ti Senado ken Kamara para iti pagsayaatan iti kaadwan ken dagiti mangmangged gapu ta ad-adda a pabpaburanda dagiti dadakkel a negosyo.
Sigun iti opisyal, awan ti kinaagpaysuna ti maibagbaga a ngumato ti presyo dagiti magatang nu maipangato ti sweldo gapu ta agtultuloy latta a ngumatngato dagitoy iti baet nga awan iti wage increase.
Innayonna a ti PhP200 wenno PhP100 a wage increase ket dakkel a katulungan kadagiti mangmangged.
Mainaig iti dayta, mamati ni Cabangon a ti rumbeng a maipaay a sweldo kadagiti mangmangged ket masapol a maibasar iti balor ti pagkasapulanda tapno mabiag a disente ken makasabay iti gunay ti inflation.
Gapu iti dayta, imbinglay ti opisyal nga agtultuloy iti panangisakadda iti 1200 a national minimum wage malaksid pay iti PhP200 wenno PhP100 a sigun kenkuana ket maysa laeng a relief a nabayag koman a naipaay.
Kabayatanna, umap-apela ni Cabangon kadagiti umili nga agtignay ken makidangadang para iti karbengan a maipaayan iti naan-anay a sweldo a sigun kenkuana, banag a saan a patpatgan iti Kamara ken Senado.//Bombo Rob Dominguez
