BAGUIO CITY – Agtultuloy ti pursuit operations nga ipatpatungpal dagiti militar kontra kadagiti nagsanod a rebelde a nakaranget dagiti kameng ti 50th Infantry Battalion (50IB) ti Philippine Army sadiay Baay, Pinukpuk, Kalinga idi kalman.
Kabayatanna, inruar ti 5th Infantry Division ti Philippine Army ti pakabigbigan dagiti pimmusay ken nadangran a soldado iti nasao nga engkwentro.
Nabigbig dagiti pimmusay a da Corporal Jeather Langcay ti Tuguegarao City, Cagayan ken Private First Class Edward Bonggat ti Tabuk City, Kalinga.
Nabigbig met dagiti nadangran a da Staff Sergeant Virgilio Jacinto ken Private First Class Keaven Macaiba.
Maipalagip a nagresponde dagiti kameng ti 50IB iti naipadanun a report manipod kadagiti sibilyan mainaig iti presensia dagiti NPA nga agkutkutong kadagiti umili iti nasao a lugar.
Iti panagturong dagiti militar sadiay ket pinaputukan dagitoy dagiti kameng ti NPA a nangitunda iti engkwentro iti nagbaetan ti dua a benneg.
Dagus a naitaray iti pagagasan dagiti nadangran a kameng ti militar bayat a mapapati nga adda met dagiti casualties iti benneg dagiti rebelde.
