BAGUIO CITY – Kimmapsot ken kimmapoy ti pwersa dagiti terorista a grupo iti rehiyon Cordillera.
Daytoy ket kas maibasar iti assessment ti Regional Mobile Force Battallion 15, Philippine Army ken Armed Forces of the Philippines.
Iti interview ti Bombo Radyo, dinakamat ni PCol. Ruel Tagle, Commander ti Regional Mobile Force Battalion a tallo a grupo ti kimmapsot ti pwersana.
Karaman ditoy ti Komiteng Larangang Guerilla (KLG)-Baggas, Kilusang Larangang Gerilya (KLG) – North Abra ken Kilusang Larangang Gerilya – Abra, Mountain Province, Ilocos Sur (AMPIS).
Gapu iti daytoy, naideklara dagiti sumagmamano a probinsiya iti Cordillera kas insurgency fade malaksid laeng iti probinsiya ti Abra.
Iti baet daytoy, impetteng ni PCol. Tagle nga adda latta ti presensiya dagiti nasao a grupo uray pay awan ti maikonsiderada a kampoda agsipud ta umak-akar dagitoy iti nagduduma a lugar iti pagilian.
Mainaig iti daytoy, agtultuloy met ti panangiyuswat ti Regional Mobile Force Battallion kadagiti nagduduma a programa kas ti “Abot Kamay” nu sadino bisitaenda dagiti unibersidad.
Babaen iti daytoy ket makaipaayda ti impormasyon kadagiti estudyante tapno saanda a marecruit ken maallukoy a makikappeng iti grupo dagiti terorista.
Ipatpatungpalda metlaeng ti programada a “panag-aywan iti Kailyan” tapno masalwadan dagiti umili ken ti “Balik Akademya” a mangipapaay ti dua a lawas a vocational training.//Mariel Apat
