BAGUIO CITY – Tuttutukan ita ti provincial government ti Benguet ti implementasyon ti enhanced community quarantine iti munisipyo ti La Trinidad kasaruno ti panakailista sadiay ti dua a positibo a kaso ti COVID-19.
Iti interview ti Bombo Radyo Baguio kenni Benguet Governor Melchor Diclas, kinunana nga ad-adda a nairtengan ti panagbantayda iti implementasyon dagiti protocol iti manarimaan a quarantine tapnu saanen a maiwaras pay ti makapapatay a virus.
Dinakamatna nga agtultuloy met ti contact tracing kadagiti nakapulapol ti 34-anyos a babai a nagapu Hong Kong ken ita ket naka-isolate iti Benguet General Hospital ken ti 6-anyos nga ubing a napan sadiay Cavite ken ita ket naka-home quarantine kadwana ti sibubukel a pamilyada.
Innayonna a natalged met ti kondisyon dagiti dua ken apaman a malpas ti 14-day quarantine dagitoy ket maalaanda manen iti swab test para iti maikadua a COVID test tapnu makita no nagnegatibon dagitoy.
Sigun pay iti gobernador, agserserbi paylaeng ti Benguet General Hospital a pasilidad para kadagiti pasyente ti COVID-19 iti probinsia.
Nupay kasta, imbingayna a posible a malpas ita a lawas ti maisagsagana a pasilidad nga agserbi nga off-site hospital a pakaiturongan dagiti persons under investigation a makapaspasar iti mild symptoms ti nasao a COVID-19.
Inaklon pay ni Gov. Diclas nga uray adda paylaeng dagiti personal protective equipment dagiti medical frontliners ket agtultuloy ti panagbiruk ken panaggatangda iti nasao a suplay tapnu adda ti maaramat iti kanito a bumayag ti sitwasyon.
