Nakemmeg iti entrapment operation dagiti otoridad ti maysa a “blocktimer” a radio commentator idiay Talisay City, Cebu a mapapati a “nangkikil” wenno dimmawat ti P4 million manipud iti mayor ti Talisay City idiay Cebu.
Maibasar iti report, dimmawat ti tulong kadagiti kameng ti pulisia ni Talisay City Mayor Gerald Anthony Gullas, Jr., tapno matiliw ti suspek a ni Roger Languieto Cimafranca, 44-anyos, a kandidato metlaeng iti kinamayor iti nasao a siudad iti Eleksyon 2025.
Nakemmeg ni Cimafranca, kaduana ti maysa pay nga indibidual iti uneg ti maysa a mall iti Barangay Lawaan 2 idiay Talisay City.
Iti reklamo ni Gullas, mapapati a dumawdawat kenkuana ni Cimafranca idi umuna a P500,000 kasukat ti panagsanodna iti panagkandidato iti kinamayor, agingga a mapapati a ngimmato ti dawdawatenna a P1.5 million, nagbalin a P2 million, ken agingga a dimmanon iti P4 million.
Inlawlawag ni Gullas a saan a napateg kenkuana nu siasinno ti makasangona iti panagbotos ngem patienna a saan a nasayaat ti panagdawat ti kuarta isut rason a nangipila daytoy ti reklamo.
Pinaglibakan met ni Cimafranca ti reklamo kontra kenkuana nga inawaganna a “politically motivated” gapu iti panagtarayna kas mayor iti nasao a siudad.
Sumangsango ni Cimafranca ken ti kaduana iti reklamo a robbery ken extortion.
