BAGUIO CITY – Nagpalawag ti Baguio City Disaster Risk Reduction and Management Office (CDRRMO) iti reklamo a saan a panagsweldo dagiti dadduma a naala a job orders para iti Community-Based Monitoring System (CBMS).
Immuna iti daytoy, nakaawat ti Bombo Radyo Baguio iti pakaseknan mainaig iti nabayag a panaguray ti sumagmamano kadagiti nangisayangkat ti CBMS iti sidong ti City Planning and Development Office idi pay Disyembre ken agingga ita ket saanda pay a naala ti sweldoda.
Sigun kenni City DRRM Officer II Cyr Bagayao, adda dagiti masursurot a pagalagadan nga intuding ti Commission on Audit ken maysa ditoy ti pagalagadan a nasken a kompleto ti accomplishment report a maisumitir iti Accounting Office.
Kinunana a nasken metlaeng a kompleto ti attachment ti report ti tunggal maysa kadagiti miembro ti maysa a team gaputa no saan ket amin a miembro ket saan a mairaman iti payroll.
Innayonna a mabalin nga ipaberipikar dagiti team members ti reportda iti Area Supervisor dagitoy sakbayda nga agsumitir.
Sigun pay kenkuana, saan a maliklikan ti nasao a pakaseknan iti panakaimplementar dagiti dadakkel a proyekto a pakairamanan ti CBMS.
Naamuan a nasurok iti 400 ti job orders iti CBMS a naisayangkat idi Oktobre agingga Disyembre ti napalabas a tawen bayat a 10-15% laeng kadagitoy ti saan pay a nagsweldo.
Dinakamat ni Bagayao nga iti kaudian nga update ket naipalusposen ti pondo para iti sweldo dagiti saan pay a nakaawat ti sweldoda ken maiwarasen iti kabiitan a panawen.
Iti agdama, agtultuloy ti house-to-house a panagkolektar dagiti enumerators kadagiti impormasyon manipod kadagiti umili ti siudad.
Puntirya ti Baguio LGU a maipasidong iti CBMS ti nasurok 105,000 a babbalay manipud iti 128 a babbaranggay ti siudad.
