BAGUIO CITY – Ad-adalen ita ti Department of Agriculture (DA) ti rason iti panagpositibo iti African Swine Fever (ASF) dagiti sumagmamano nga alingo sadiay Abra a nangitunda iti outbreak ti nasao a sakit iti sumagmamano a munisipyo sadiay.
Sigun kenni DA-Cordillera Regional Director Cameron Odsey, malaksid kadagiti commercialized a baboy ket naduktalan ti kaadda ti ASF virus kadagiti sumagmamano nga alingo sadiay.
Kinunana nga adda dagiti mangnganop a nangiyuman kadakuada nga addan dagiti natay nga alingo kadagiti kabambantayan ti Abra ken naduktalan a gapu daytoy iti panagpositibo iti ASF dagiti nasao nga alingo.
Dinakamatna a kitkitaenda ti posibilidad no adda dagiti mangnganop a nagkapan kadagiti alingo iti processed food a nagtaud kadagiti lugar nga addaanen ti kaso ti ASF.
Kagiddan iti daytoy, inaklon ni Odsey a marigatanda a mangduktal iti rason ti panagpositibo iti ASF dagiti alingo nangruna ta adda dagitoy kadagiti kabakiran ken narigat a maanop.
Inyunay-unayna met a maysa daytoy a rason no apay nga saan paylaeng a nakontrol ti ASF sadiay Abra.
Kabayatanna, agtaltalinaed a siam ti aktibo a kaso ti ASF kas maibasar iti kaudian a panagwanawan ti DA-Cordillera ken dagitoy ket nailista sadiay Abra ken Apayao.
Iti baet daytoy, maragsakan ni Odsey gaputa in-inot ti panaka-kontrol ti presensia ti ASF ditoy rehiyon.
