BUGUIAS, BENGUET – Manarimaan paylaeng ti imbestigasyon ti Bureau of Fire Protection-Buguias nu anya ti gapu ti nauram a balay sadiay Cabuguiasan, Natubleng, Buguias, Benguet idi Enero bente kuatro.
Iti pannakiuman ti Bombo Radyo kenni SFO2 Ruel Basilio, investigator, kasarsaritada pailaeng dagiti witness ken kaaruba da Hilda Benito ken Morris Benito, ti akin balay iti nauram.
Ti two-storey house ket naaramid iti kayo ken sisim rason a nalaka a nagwaras ti apoy ken nauram nga awan ti nabati a kagawaan.
Mapatta-patta met a dumanon iti nasurok P75,000 ti danyos ti uram.
Maipalagip nga idi laeng kalman a napan dagiti kameng ti Bureau of Fire Protection-Buguias iti nakapasamakan ti insidente gapu ta saan daytoy a naireport kadakuada.
Sigun kenni SFO2 Basilio, narigatan dagitoy a nakadanon iti nasao a site gapu ta malaksid nga adayo ket saan pay a madanon ti fire truck gapu ta nalipit ti kalsada.
Innayonna pay a saanda a nadanon dagiti agtagikua iti balay agsipud ta adda dagitoy iti ospital.
Iti agdama ket agkidkiddaw met iti tulong ni Hilda Benito agsipud ta malaksid a naospital ti anakna nga isu ti bambantayanna ita ket napukaw pay ti balay dagitoy.
