BAGUIO CITY – Im-imbestigaran ti pulisya ti panakasarak ti bangkay ti maysa a lalaki sadiay Purok 6, Bulanao Centro, Tabuk City, Kalinga.
Nabigbig daytoy a ni Victorino Balanay, 31-anyos, laborer ken residente ti Natappian West, Solana, Cagayan.
Maibasar iti report ti Kalinga Provincial Police Office, naitawag kadakuada ti nasarakan a bangkay iti maar-aramid a balay sadiay Purok 6, Bulanao, Tabuk City.
Dagus a nagturong dagiti pulis iti nasao a lugar ken sadiay a nakita ti nakadasay a bangkay ti lalaki.
Naduktalan iti inisyal nga imbestigasyon a nag-inom iti arak ti biktima ken dagiti katrabahuanna iti kusina ti ar-aramidenda a balay iti alas-siyete ti rabii ken nagsisina dagitoy iti alas-onse ti rabii tapnu maturog.
Nupay kasta, idi riniing ni Marlou Turingan ni Balanay iti kabigatanna ket nadlawna nga awananen iti anges ni Balanay.
