KABAYAN, BENGUET- Manarimaan ti imbestigasyon dagiti kameng ti Bureau of Fire Protection – Kabayan iti rason ti mapaspasamak a forest fire idiay Kabayan, Benguet a nagrugi idi Pebrero 24, iti agdama a tawen.
Iti exclusive interview ti Bombo Radyo kenni Senior Fire Officer 4 Frederick Calama, Acting Municipal Fire Marshall ti BFP – Kabayan, bimmayag ti panagresponde dagiti kameng ti bombero gapu iti sitwasyon ti bantay nu sadino awan ti umno a pagpuestoan dagitoy.
Innayonna a nangato dagiti bantay, awan ti trail isu nga ur-urayenda laeng ti mabalin a pagsebsebanda iti apoy.
Nupay kasta, dinakamatna a ti bambantayanda iti agdama ket dagiti residential areas tapno awan ti umasideg nga apoy babaen iti panangaramidda ti firelane.
Daytoy ket tapno saan pay a lumawa ti panagramaram ti apoy ken ma-control daytoy.
Mapatta-patta a dumanon iti 170 ektarya ti kalawa ti daga a naapektaran iti forest fire.
Iti agdama, daytoyen ti maika-uppat a forest fire a nailista ti Bureau of Fire Protection – Kabayan manipud Enero.
Kabayatanna, inaklon ni Calama a saan nga umdas ti pagalaanda iti suplay ti danum iti kanito a mapasamak manen ti aniaman a kita ti uram.
Kinunana nga apaman a mauram ti kabambantayan ket maapektaran ti watersource sadiay Kabayan.
Nupay kasta, impeksana nga agtultuloy ti Information, Education, and communication (IEC) Campaign dagitoy maipapan iti panakalapped ti uram iti nasao a municipyo.//Bombo Marinel Rodrigo
