BAGUIO CITY – Nangrugin idi kalman ti Rat Catching Challenge a paset ti kampanya tapnu mapagtalinaed ti kinadalud ti city public market kagiddan ti agtultuloy nga Enhanced Community Quarantine iti Luzon gapu iti COVID-19.
Agpaut ti Rat Catching Challenge iti uneg ti dua a bulan ken daytoy ket para kadagiti agilaklako iti tunggal section ti merkado publiko.
Makaawat iti P20,000 ti market section a makatiliw iti kaaduan nga utot bayat a makaawat iti P10,000 ti market section a makatiliw iti sumaruno a kaaduan nga utot.
Iti panagsarungkar ni Mayor Benjamin Magalong iti merkado publiko ket imbilinna ti panakaimuntar ti maysa a mouse trap iti tunggal dua a vendor.
Inyunay-unayna a ti kinadalus ti maysa kadagiti susi tapnu malapdan ti panagwaras ti coronavirus ken kangrunaan a pakaseknan ti kaadda dagiti otot iti wet market a nasken a dagus a maaksionan babaen iti nasao a rat control program.
Iti met panakiyuman ti Bombo Radyo Baguio kadagiti agilaklako iti merkado publiko, impeksada ti panangkanonongda iti nasao a programa gaputa sigun kadakuada ket makatulong daytoy iti pagsayaatan ti amin malaksid pay iti diaya a gunguna.
Kinunada a babaen iti nasao a programa ket in-inot a madalusan ti merkado.
Naamuan nga innaldaw a maiturong dagiti natiliw nga utot kadagiti istasyon ti pulisya tapnu mailista ken mabilang dagitoy.
Maibasar iti datus ti Baguio City Public Market Superintendent Office, pakabuklan a 131 nga utot ti natiliw iti umuna nga aldaw ti Rat Catching Challenge.
