BAGUIO CITY – Naawaten da DOTr-Cordillera Regional Director Jose Eduardo Natividad ken Assistant Regional Director Mohammad Nasser Abbas ti 90-day suspension dagitoy nga impaulog ni Transportation Secretary Arthur Tugade.
Maibasar iti waragawag ti DOTr, impaulog ni Tugade ti suspension order kontra kada Natividad ken Abbas gapu kadagiti alegasyon ti korapsion.
Kinuna pay ti ahensia a nangipilada iti kaso kontra kadagiti dua a kangatuan nga opisyal ti DOTr-Cordillera.
Sigun iti DOTr, nakaawat daytoy kadagiti report a nagkidkiddaw ken immaw-awat iti kwarta ni Natividad kasukat ti panangpaborna iti panakaipaay ti Certificates of Public Convenience (CPC) para iti franchise applications.
Im-imbestigaran pay ti departamento ti maatap a panangikalikagum ni Natividad iti panangisumitir dagiti district heads iti koleksion manipud iti sugal malaksid pay a napaay ti RD a mangipatungpal kadagiti operasyon kontra kadagiti lugan nga agbibiahe nga awanan ti prangkisa malaksid iti masansan a kaawan daytoy iti opisina.
Maatap met a nagkikil ni Abbas kasukat ti panakawayawaya dagiti na-impound a luglugan malaksid pay iti impila ti maysa a babae kontra kenni Abbas gapu iti gun brandishing ken toting.
Naipaayan da Natividad ken Abbas iti 72 nga oras tapnu sungbatanda dagiti akusasyon bayat a mangdutok ti ahensia iti agserbi nga officer-in-charge ti DOTr-Cordillera.
Impasigurado ti DOTr a no mapaneknekan a pudno dagiti akusasyon ket maikkat dagiti dua manipud iti serbisyo.