BAGUIO CITY – Inkari ni re-elected Abra Congressman Joseph Bernos a paimbestigaranna iti Kamara ti patiena a ‘partisan’ acts ti Criminal Investigation and Detection Group (CIDG) iti kaleppas a midterm elections iti probinsiada.
Maibasar iti impormasyon a naala ti Bombo Radyo, sumagmamano a minutos kalpasan ti proklamasyon ni Bernos idi rabii ket nakaawat daytoy iti impormasyon a nasurok 100 a personnel ti CIDG ti nangisayangkat ti undocumented ken illegal activities para iti naabak a congressional bet a ni Victoria Seares-Corpus.
Naamuan a ni Congressman Bernos ket vice-chair iti Committee on Peace and Order iti Kamara bayat a ti naabak a congressional bet a ni Seares-Corpus ket asawa ni CIDG Director Major General Amador Corpus.
Sigun kenni Bernos, kiddawenna ti panakaisayangkat ti congressional inquiry iti nasao nga isyu tapnu maamuan ti publiko ti kinapudno.
Innayonna nga adda ti iggemda nga ebidensia a nakibiang ti CIDG iti panagrugi ti kampanya agingga iti mismo nga aldaw ti eleksion idi Lunes, May 13. (BR Vigan)
