Kinanunungan ni Baguio City Councilor Rocky Aliping ti kinuna ni Baguio City Mayor Benjamin Magalong a kasapulan a mare-assess dagiti babbarangay iti siudad seknan iti status dagitoy mainaig iti iligal a droga.
Iti panakiuman ti Bombo Radyo kenni Aliping, presidente iti Association of Barangay Captains-Baguio, inaklonna a sumagmamano latta kadagiti babbarangay iti Baguio City ti agtaltalinaed a saan pay a naidekalara a drug-free.
Maipalagip nga immunan a naipakaammo nga agarop 90% kadagiti babbarangay iti Baguio City ti naideklaran a drug-free ngem saan nga inlibak ti opisyal a narigat latta a maduktalan dagiti agar-aramat wenno mangipuspuslit kadagiti iligal a droga nangruna ita ta naduktalan nga adda iti maysa a kameng iti pulisya a kinakuntyaba dagiti naglabsing iti Comprehensive Dangerous Drugs Act of 2002.
Mainaig iti dayta, imbinglay ni Councilor Aliping nga agtultuloy latta ti koordinasyon dagiti opisyales iti babbarangay iti Baguio City ken dagiti kameng iti pulisya nu sadino, regular a maipatpatungal dagiti taripnong, ken maisumsumitir dagiti reports seknan iti status dagiti babbarangay mainaig iligal a droga.//Bombo Rob Dominguez
