BAGUIO CITY – Nailista iti napalabas a weekend ti record-high wenno kangatuan a bilang dagiti turista a simmangbay iti siudad ti Baguio iti las-ud ti agarup tallo-tawen a pandemya.
Sigun kenni City Tourism Officer Aloysius Mapalo, agarup 15,000 a turista ti simmangbay iti siudad idi laeng napalabas a Sabado.
Kinunana nga idi weekend ket mapattapatta nga agarup 20,000 a turista ti napasangbay ti siudad, maysa a lawas sakbay ti Panagbenga inton sumaruno a lawas.
Gapu iti daytoy, dinakamatna a 20,000 agingga 25,000 iti innaldaw ti agbalin a threshold ti siudad iti tourism arrival kas maibasar iti nailista idi napalabas a weekend.
Sigun kenkuana, babaen iti Baguio VISITA a registration platform para kadagiti turista ket mamintinir ti nasao a bilang dagiti mapalubusan a makastrek iti siudad.
Inyunay-unayna nga iwanwanawanda ti aktuwal a kapasidad dagiti accommodation establishments iti siudad isut gapuna a maikalkalikagum ti panagrehistro dagiti turista tapnu maipasigurado a maitunos ti bilang dagiti turista nga aktuwal a sumsumrek iti siudad iti kapasidad met dagiti accommodation establishments.
Impettengna a babaen iti ‘normal sustainable tourism’ a mangipalubos iti panagnayon dagiti turista iti siudad kabayatan ti pandemya ket matulongan met dagiti stakeholders ti sektor ti turismo ken panagnegosyo a makabangon manipud iti epekto ti pandemya.
