BAGUIO CITY – Winaswasen ti Police Regional Office Cordillera (PROCOR) ti Regional Drug Enforcement Unit (RDEU) kalpasan ti maatap a panakairaman ti dua a personnel daytoy iti panakakawtibo ken panakapapatay ti maysa a residente ti Baguio City idi napalabas a bulan ti Nobyembre.
Kagiddan daytoy ti panangikari ni PROCOR regional director PBGen. R’Win Pagkalinawan iti panakaipaay ti hustisya iti daydi Harjan Lagman.
Immunan a kinumpirmar ni Baguio City Mayor Benjamin Magalong a dua kadagiti suspek ket pulis ken dagitoy ket kameng ti RDEU ti PROCOR.
Iti official statement nga inruar ti PROCOR, kinuna ni Gen. Pagkalinawan a naklaat ken nalidayan daytoy gaputa naaramid ti kameng ti pulisya ti naranggas unay a krimen malaksid a gapu iti daytoy ket naipababa ti moral ti entero a pwersa ti pulisya iti Cordillera.
Nupay kasta, inyunay-unayna met a mismo a dagitoy ti nangimbestigar, nangbigbig ken mangipila iti kaso kontra kadagiti suspek, pakairamanan dagiti suspek a kadwada iti serbisyo.
Impettengna pay a ti kaso ket isolated incident ken saanda a panuynuyan wenno saanda a baybay-an ti aniaman a dakes wenno maikaniwas iti linteg nga aramid dagiti kadwada a pulis.
Impeksa metlaeng ni Gen. Pagkalinawan ti panakipagriknada iti pamilya Lagman.
Inyulitna manen nga iti baet ti insidente ket agtalinaed ti commitment ti PROCOR a mangipaay iti kasayaatan a serbisyo publiko kadagiti umili ti Cordilleras ken agtalinaedda a napudno iti insapatada a panangsalaknibda kadagiti umili tapnu maikarida a maawagan a ‘Cordillera’s Finest’.
