Nagballaag ni Police Master Sergeant (PMSg) Randy Angday manipud Regional EOD and Canine Unit Cordillera (RECU CORDILLERA) iti publiko kalpasan ti napasamak a pannakasabog ti bomba iti maysa a lalaki idiay Sablan, Benguet.
Sigun kenkuana, dagus a nagresponde dagitoy apaman a naitawag kadakuada ti nasao nga aksidente isu’t gapuna a dagus met a naiturong daytoy iti pagagasan nupay kasta saan a naispal daytoy.
Nangisayangkat metlaeng dagitoy iti inspeksyon iti nakapasamakan ti nasao nga aksidente no sadino idiay a natakuatanda ti maysa a pay 75mm a bomba.
Gapu iti daytoy, inyunay-unay ni Angday iti publiko apaman a makakitada iti kastoy a banag ket saanda nga ig-igaman ken dagus nga ireportda kadagiti otoridad agsipud ta narigso daytoy ken mabalin a mangitunda iti ipupusay ti maysa nga indibidual.
Kabayatanna, manarimaan ti pannakaiproseso ti disposal operation dagitoy para iti pannakaibelleng dagiti bomba a nadiskubre-da partikular iti paset ti Benguet, Mountain Province ken idiay Ifugao.
Iti agdama agtultuloy latta, ti educational campaign program dagitoy tapno mapalagipan dagiti publiko mainaig kadagitoy a banag.//Bombo Rosemarie Bulsao
