Manarimaan ti imbestigasion ti regional police director iti Central Luzon kasaruno ti pannakadiskobre ti iligal a Philippine Offshore Gaming Operator (POGO) hubs idiay Bamban, Tarlac ken Porac, Pampanga.
Daytoy ket sigun kenni Philippine National Police chief Police General Rommel Francisco Marbil ita nga aldaw.
Immunan a binallaagan ni Marbil dagiti pulis a maipasango dagitoy iti “disciplinary actions” apaman a maduktalan a karamanda iti operasion ti iligal a Philippine Offshore Gaming Operator (POGO).
Dinakamatna a naikkaten dagiti dadduma nga opisial a kameng ti pulisia iti puestoda gapu iti mapapati a kinakurang ti aksion dagitoy.
Maipalagip a naduktalan dagiti pulis ken Presidential Anti-Organized Crime Commission (PAOCC) ti sumagmamano a banag a naaramat iti panangdangran, ken sumagmamano nga alikamen a mausar a mang-clone kadagiti SIM card ken mangipatulod kadagiti text blast.
Kabayatanna, innem a Chinese a mangmangged iti POGO manipod iti na-raid a POGO hub idiay Bamban, Tarlac ket naduklatan a “fugitive” a sumangsango iti kaso manipod iti nagtaudanda a pagilian.
Naipaay metten ti warrant of arrest kontra kadagitoy.
