Pinalagipan ti Commission on Elections (Comelec) ti publiko iti panagrehistrodad gaputa aglepassen ti programa a Register Anywhere Project (RAP) ti 2025 national and local elections (NLE) inton Agosto 31, 2024.
Sigun iti nasao nga ahensia, mabalinda pay nga agpareshitro tapno makabotos iti masakupanda a lugar agingga iti ngudo ti agdama a bulan.
Ti satellite registration sites ket nakalukat manipod Lunes agingga Sabado, pakairamanan ti holiday, manipod alas 8 ti agsapa agingga alas 5 ti malem.
Dagiti botante a “deactivated” ket mabalin metlaeng nga agaplikar para iti “reactivation” kadagiti satellite registration sites, kasta metten dagiti “overseas voters” nga adda iti Pilipinas para iti 2025 NLE.
Kalpasan ti panagleppas ti Register Anywhere Project (RAP), dagiti aplikante ket mabalin latta nga agturong ti aniaman nga opisina ti COMELEC tapno agparehistro, ken dagiti Pilipino idiay ballasiw-taaw ket mabalin met nga agaplikar iti masakupanda nga embahada.
Ti panagrehistro dagiti botante para iti May 2025 midterm election ket nangrugi idi Pebrero 12, ken agleppas inton Setiembre 30, 2024.
Maipalagip nga immunan a kinuna ni Comelec Chairperson George Erwin Garcia a saanen a mailaylayon ti panagrehistro iti kanito a malpas ti deadline inton Setiembre 30, 2024.
