BAGUIO CITY – Agtultuloy ken regular ti panagwanawan ti Department of Health (DOH) – Cordillera kadagiti nagduduma a pagtagilakuan ti agas ditoy rehiyon.
Sigun kenni DOH-CAR Assistant Regional Director Dr. Amelita Pangilinan, manarimaan ti panagrikos dagiti pharmacists ti ahensia para iti random ken regular pharmacy monitoring kadagiti agas nangruna kadagiti COVID-19 drugs ken suplay ti alcohol, cough medicine, multivitamins ken dadduma pay.
Kinunana nga iti inspeksion a naisayangkatda ket awan ti naobserbaran a parikot nangruna kadagiti suplay ti agas.
Inaklonna met a saan a maliklikan nga adda dagiti report a naaw-awatda iti panagkurang dagiti sumagmamano nga agas.
Nupay kasta, kinunana a saan a mabayag ti panagkurang ti suplay dagiti agas.-patrol7
