BAGUIO CITY – Agtultuloy ti rehabilitasyon kadagiti napanawan a rice terraces sadiay Banaue, Ifugao.
Sigun kenni Banaue Mayor Jerry Dalipog, nangited ti maysa a dakkel a kompanya iti P3-M para iti panakaisubli ti sigud a langa dagiti rice terraces iti munisipyo dagitoy.
Kinunana a dumanon ita iti 20 a rice terraces ti naipasidongen iti rehabilitasyon ken namulaandan ti 8 nga ektarya babaen iti nasao a pondo.
Dinakamatna nga idi 2015 ket 504 nga ektarya dagiti rice terraces ti naabandona sadiay bayat a puntiryada a malpas ti rehabilitasyon iti uneg ti dua a tawen.
Mangnamnama met ti mayor a makaawatda iti kanayonan a P3-M manipud iti kapada a kompanya para iti panakaituloy ti nasao a rehabilitation program.
Dumanon met iti P394.4-M ti nailatang para iti kapada a programa manipud iti 2018 General Appropriations Act, Tourism Infrastructure and Enterprise Zone Authority, Department of Public Works and Highways ken Department of Agriculture.
Limmatak ti 2,000-year-old terraces ti Banaue kalpasan a nabigbig daytoy kas Eighth Wonder of the World ken naideklara kas maysa nga UNESCO World Heritage Site idi 1995.
