BAGUIO CITY– Impaganetget ti maysa a konsehal ti Baguio City a nasken a balanse-en ti lokal a gobierno ti siudad ti addang dagitoy iti panakapapintas ti merkado publiko.
Daytoy ket kalpasan a nangabak ti public-private partnership (PPP) a modality iti rehabilitasyon ti Baguio City Public Market kas resulta ti panagbutos dagiti konsehal idi napalabas a lawas.
Iti panakiyuman ti Bombo Radyo kenni Councilor ken dadaulo ti Comittee on Market, Trade and Commerce, and Agriculture iti konseho a ni Philian Weygan-Allan, kinuna a nasken a maadal nga usto ti dagiti maiwayat a kondisyon ti PPP para iti development ti merkado.
Kinunana a nasken a kitaen nga usto ti lokal a gobierno ti agbalina a realisasyon dagitoy iti napili a modality ti merkado.
Inyunay-unayna a maipangruna latta koma ti pakaseknan dagiti market vendors, ti publiko ken ti siudad iti kondisyon ti PPP saan ket a maiprayoridad dagiti korporasyon a mangiggem iti nasao a development.
Innayun pay ti konsehal a mabalin a maamiyendaran dagiti nailanad a kondisyon ti PPP a tapno maitunos iti pudpudno a pagdur-asan ken pagsayaatan ti kaaduan.
