BAGUIO CITY – Nakailista ti rehion Cordillera iti kanayunan nga ennem a baro a kaso ken dua a recoveries ti COVID-19 ita nga aldaw.
Maibasar iti report ti Department of Health-Cordillera, nanayunan iti dua a kaso ti virus ti siudad ti Baguio babaen iti 58-anyos a lalaki manipud sadiay Bakakeng Norte ken ti 22-anyos a babai a residente ti Loakan Liwanag.
Kabayatana, nanayunan iti tallo a kaso ti nailista ti probinsia Benguet no sadino nagpositibo iti virus ti 39-anyos a lalaki sadiay Camp 3, Tuba, Benguet ken ti 16-anyos a lalaki ken 42-anyos a babai nga agpada a residente ti Betag, La Trinidad, Benguet.
Naamuan a naala dagiti dua a nagpositibo sadiay La Trinidad ti virus manipud kadagiti nakapulapolda a nagpositibo metlaeng iti COVID-19.
Nagpositibo met ti 30-anyos a pulis manipud Kalinga ken adaan iti travel history sadiay Marikina.
Iti agdama, pakabuklan a 48 ti nailista a kaso ti COVID-19 sadiay probinsia ti Benguet bayat a pakabuklan a 50 a kaso ti COVID-19 ti nailista ti Baguio City.
Iti met intero a rehion Cordillera, pakabuklanen a 133 ti nailista a kaso ti virus no sadino 23 dagiti agtaltalinaed kadagiti ospital, 108 dagiti nakarekober ken dua ti pimmusay.
