Nakairekord iti 77 nga insedente ti vehicular traffic incidents ti rehiyon Cordillera manipud Agosto 1 agingga Agosto 22 iti agdama a tawen.
Iti pannakiuman ti Bombo Radyo kenni PolCol Genevieve Revocal, Police Information Officer ti Police Regional Office Cordillera, impeksana a nairekord ti kangatoan nga insidente iti Baguio City Police Office iti bilang a 31 ken sinaruno iti Benguet Provincial Police Office iti bilang a 29.
Maibasar kadagiti report, kaaduan nga insidente ket Reckless Imprudence Resulting in Damage to Property ken Reckless Imprudence Resulting in Physical injury no sadino kangrunaan a rason ket human error kas iti kinakurang iti panagannad, saan a disiplinado a panagmaneho, saan a panagtulnog kadagiti linteg trapiko, mechanical defect kasta metten iti wet and muddy road condition nga ituntunda iti agtultuloy a panagtudtudo ken napuskol nga angep.
Kabayatanna, adda met ti innem a kalsada iti rehiyon Cordillera ti saan pay laeng a madalyasatan, tallo kadagitoy ket masarakan idiay Abra pakairamanan ti San Emilio Road, Gubing Road Section, ken Dominglay-Sucao Road, Licuan-Baay, Abra.
Dagiti tallo a nabatbati ket nairekord iti probinsya ti Benguet pakairamanan ti Sitio Goldfield, Poblacion, Itogon, Benguet, Amburayan-Boneng Road, ken Benguet-Nueva Vizcaya Road idiay Beckel, La Trinidad.
Iti sabali a bangir, nagballaag met ni PolCol Revocal kadagiti umili, nangruna kadagiti motorista, a kanayon nga agannad ken agbalin nga alerto no agmaneho, nangruna iti agtultuloy a panagtudo iti rehion.
Imbilinna met kadagiti motorista nga ikonsidera ti kondisyon ti kalsada, kontrolen ti kapartak iti panagmaneho, ken kanayon sumurot kadagiti pagannurotan iti trapiko tapno maliklikan dagiti aksidente ken mapagtalinaed ti kinatalged iti bukod a bagi. //via Bombo Khey Reparip