BAGUIO CITY- Inaklon ti maysa a grupo ti sektor ti transportasyon iti Cordillera ken Region 1 a pangta ken dakkel ti epekto iti birukda ti panagbiahe ti Hop-on, Hop-off (HOHO) Tourist Bus iti Baguio City.
Iti interview ti Bombo Radyo Baguio kenni Pat Evangelista, mangidadaulo iti maysa a transport group iti COrdillera ken Region 1, inkalinteganna ti panagrekloma dagiti sumagmamano a drivers ken operators iti panagbiahe ti HOHO Tourist Bus idi Maundy Thursday.
Impeksana nga awan ti naawatda a paakdaar iti panagbiahe daytoy malaksid pay nga agbalin a kakompetensia dagiti pasahero ken operators ti HOHO bus nangruna ta libre a maidiaya kadagiti turista.
Inkalinteganna a siguden nga insuhestionda kadagiti naglabas a taripnong, a mabalin nga ibati dagiti turista ti luganda kadagiti hotels wenno transport terminals tapnu saan a makainayon iti trapiko ken dagitoyen ti maka-ammo iti transportasyon dagiti turista paturong kadagiti tourist sites.
Inayonna a napinpintas nu maipa-ima kadagiti sektor ti transportasyon dagiti turista nangruna ta kabisado met dagiti drives dagiti tourist sites imbes a mangipastrek kadagiti baru nga yunit.
Kabayatanna kinuna pay ni Evangelista a nasken nga sukimaten dagiti regulating agency ti operasyon ti HOHO bus nangruna ta amin met nga passenger vehicles ket nasken nga agtulnog kadagiti maikalkalikagum a paganurutan sakbay ti panagbiahe dagitoy.
Inyunay-unayna a nupay napintas ti panggep ti epekto ti HOHO bus a mangkessay iti trapiko ket mapukawanda met iti biruk.
Maipalagip a naiyuswat ti panagbiahe ti dua nga yunit ti HOHO bus idi Abril 14 a nadiaya nga libre kadagiti turista a nagrehistro iti VISITA App ken addaan iti QTP ngem nasuspindir idi Biernes Santo, Abril 15 kalpasan ti reklamo dagiti drivers ken operators.
