Inadaptar ti Kamara ti rekomendasion ti Committee on Good Government and Public Accountability a mangipila iti reklamo kontra kenni Vice President Sara Duterte gapu iti mapapati a saan a nasayaat a panangaramatna iti confidential funds ti Office of the Vice President ken ti Department of Education para iti tawen 2022 agingga 2023.
Dagiti rekomendasion—a linaon ti report ti komite nga indatag ti committee chairperson Manila Representative Joel Chua bayat ti plenario—ket para iti technical malversation, perjury, bribery, ken plunder charges a maipila kontra kenni Duterte.
Inrekomendar pay ti komite ti pannakaipila ti kriminal, sibil, ken administratibo a reklamo a technical malversation, palsification, panagusar kadagiti palso a dokumento, perjury, bribery, corruption of public officers, plunder, betrayal of public trust, ken culpable violation iti Konstitusion kontra kadagiti dadduma nga opisial.
Nakalanad pay iti committee report dagiti mapagduaduaan a dokumento nga insubmitir ti OVP ken ti DepEd.
Dagiti rekomendasion ket nakabasar iti imbestigasion ti committee iti mapapati a saan a nasayaat a panangaramat iti P500 million confidential funds ti OVP ken P112.5 million confidential funds para iti DepEd idi tawen 2022-2023 idi nagtugaw kas secretary ti education department.
Nupay kasta, pinaglibakan amin ni Duterte dagiti alegasion.
