Indagadag ti Malacañang ni Davao City 1st District Representative Paolo “Pulong” Duterte a mangisubmitir iti dokumento a mangpaneknek a naileppas amin dagiti flood control projects a naimplementar kabayatan ti termino daytoy.
Sigun kenni Palace Press Officer Undersecretary Atty. Claire Castro, paneknekan ni Duterte a naileppas amin a flood control projects sadiay Davao.
Impeksa ni Castro a rumbeng nga insubmitir ti opisial dagiti dokumento ti pannakaileppas dagiti proyekto idi paylaeng kidkiddawen ti Independent Commission for Infrastructure (ICI).
Maipalagip a binabalaw ni Duterte ni Ombudsman Jesus Crispin Remulla kalpasan ti kinuna daytoy a sentro ti flood control corruption ti Davao.
Sigun kenni Duterte, rumbeng a maimbestigaran metlaeng dagiti naimplementar a proyekto sakbay ti termino daytoy ken impaganetgetna nga addaan iti dokumento a mangpaneknek a nalpas dagiti proyekto iti termino daytoy.
Nupay kasta, kinuna ni Atty. Casto a saan nga umdas ti dokumento a mangpaneknek a nalpas ti proyekto.
Iti baet dayta, impanamnama ni Castro nga ituloy ti administrasyon a risuten ti panagyus kadagiti nagduduma a paset ti pagilian, pakairamanan ti Davao City.