BAGUIO CITY-Impetteng ni Ifugao Rep. Teddy Baguilat Jr. a nasken nga ipangruna pay nga umuna ti Duterte Administration ti reporma iti justice system ti pagilian sakbay ti pannakaisakad ti pannakaisubli ti dusa a patay.
Iti eksklusibo a pannakipatang ti Bombo Radyo Baguio iti kongresista, kinunana nga agingga nga agtaltalinaed a nabuntog ken saan a mapangnamnamaan ti sistema ti hustisia iti pagilian ket saan a sigurado a managdakdakes amin dagiti mapatawan iti death penalty.
Inaklonna nga adu ti kontrobersia iti justice system ti pagilian gapu iti pannakairaman dagiti ukom ken prosekutor iti panagawat iti pasusuksok.
Dinakamat ni Baguilat a kaaduan kadagiti kongresista ti saan pay a nakadesision nu umanamong wenno tubngarenda ti panggep a pannakaisubli ti dusa a bitay iti pagilian.
Sigun iti mammanday-linteg, saan met laeng a nalawag no ania a kita ti execution ti maipatungpal iti kanito a maisubli ti dusa a bitay.
Impetteng ni Baguilat nga awan met laeng ti pammaneknek a bumaba ti kriminalidad iti maysa a pagilian nu mabitay dagiti kriminal.
Kinunana pay nga agbalin laeng a kakatkatawa ti Pilipinas no maisubli ti dusa a bitay gaputa adu dagiti Overseas Filipino Workers (OFWs) a naituding a mabitay iti sabali a pagilian.
Sigun iti Liberal Party (LP) congressman, iti kanito a maisubli ti dusa a bitay, saanen a mabalin nga agkiddaw iti clemency ti Pilipinas para kadagiti OFWs gapu ta ti mismo a gobierno daytoy ket mangipawpataw iti dusa a bitay.
Impetteng ti pannakabagi ti probinsia ti Ifugao nga ‘anti-poor’ ti death penalty gapu ta saan a kabaelan dagiti nakukurapay ti mangbayad kadagiti abogado a mangidepensa kadakuada.
Iti baet daytoy, impetteng ni Baguilat a nasken a madusa ken agsungbat iti linteg dagiti managdakdakes.
Kinunana nga iti bukodna a panangmatmat ket umdasen ti tunggpal biag a pannakaibalud a maipataw kadagiti nakaaramid iti nadadagsen a krimen.
