Kinnidaw ni Batangas 1st District Representative Leandro Leviste iti Office of the President a paimbestigaranna dagiti reports iti maatap a diskriminasyon iti panangipaay ti ayuda.
Inwaragawag ti mammanday linteg idi kalman iti House of Representatives nga adda ti maysa a kapitan a binagaan ti presidente ti Liga ng Barangay idiay Batangas a saan dagitoy a karaman kadagiti maipaayan ti ayuda gapu ta “inmapos” kadakuada ti gobernadora a ni Vilma Santos-Recto.
Sigun iti kongresista, naiyumanen ti nasao nga isyu iti Malacanang ken impanamnama pay ti Palasyo ti dagos a pannakaisagana ti P200,000 para kadagiti babbarangay a saan a nairaman iti panangiwaras ti ayuda idi kalman.
Kinnidaw met ni Leviste kenni President Ferdinand Marcos, Jr. nga ipaay ti nasao a gatad kadagiti saan a naimbitaran a barangay ket paimbestigaranna ti panangipaay ti ayuda nga idadauloan ni Executive Secretary Ralph Recto.
Inmapela pay daytoy a suspendiren ti presidente ti excise tax ken value-added tax ti produkto a petrolyo tapno saan a mairaman ti amin a Pilipino iti saan a nasayaat a sistema ti panangipaay ti ayuda.
Mainaig iti dayta, nangipila idi kalman ni Representative Leviste ti maysa a House Resolution a mangidagdagadag iti Office of the President nga imbestigaran dagiti report ti maatap a diskriminasyon ket korapsyon kadagiti programa ti ayuda a maipatpatungpal kadagiti babbarangay tapno masigurado ti transparent ken patas a panangipaay iti pundo iti lokal a gobyerno. //bombokaren.c.s