Inrekomendar ti Physician iti House of Representatives ti temporaryo a saan a panakipaset ni Cassandra Li Ong iti agtultuloy a House Quad Committee hearing maipapan iti isyu ti Philippine Offshore Gaming Operators (POGOs) ita nga aldaw.
Kasaruno daytoy iti panakaulaw ken panagbaba ti blood pressure ni Ong bayat ti nasao a hearing.
Sigun kenni House Physician Dr. Jose Luis Bautista, unstable ti kasasaad ni Ong ken inrekomendarna a dagus a maipan ni Ong iti ospital para iti medical test.
Immanamong met dagiti mammanday-linteg iti rekomendasion ni Bautista a maipatulod ni Ong iti ospital para iti medical examinations.
Iti agdama, saan pay nga inwaragawag ti quad committee ti schedule para iti sumaruno a hearing.