BAGUIO CITY – Mabalinen nga agpa-booster shots iti COVID-19 vaccine dagiti tattao nga agturturong iti mismo nga uneg ti kadakkelan a mall ditoy siudad ti Baguio.
Kasaruno daytoy ti panakaiyusuat ti Resbakuna sa Botika iti maysa a nalatak a pharmacy iti uneg ti nasao a mall.
Nagbalin a partner ti nasyonal a gobyerno ti nasao a pharmacy tapnu maipaayan ti umdas a proteksion ti publiko kontra kadagiti nakakaro a kaso ti COVID-19 ken maipaayan dana ti panagrekober ti ekonomiya.
Mailukat ti Resbakuna sa Botika iti innaldaw para kadagiti kustomer a kayatda ti agpa-booster shot malaksid laeng kadagiti senior citizens ken dagiti addaan ti comorbidities.
Naamuan nga ita paylaeng ket booster shots ti ipaay ti nasao a pagpabakunaan kontra iti COVID-19 ngem manamnama a mangipaaydan to ti first dose ken second dose iti suporta ti lokal a gobyerno ti Baguio.
Dinayaw met ni Tourism Secretary Bernadette Romulo-Puyat ti lokal a gobyerno ti Baguio iti panagbalin ti siudad kas ‘trailblazer’, partikular iti panagbalin daytoy a kaunaan nga LGU a nangilukat ti turismo idi 2020, kaunaan nga LGU a nangirugi ti online tourist registration portal, maysa kadagiti LGU a kaunaan a nakaragpat iti 100% vaccination iti eligible residents ken ita ket kaunaan nga LGU iti ruar ti National Capital Region a nangiyusuat iti programa a Resbakuna sa Botika.
Immunan a kinuna ni COVID-19 Response Deputy Chief Implementer Secretary Vince Dizon a dua a pharmacies iti siudad ti pakailukatan ti Resbakuna sa Botika.
Maipalagip a naiyusuat ti Resbakuna sa Botika sadiay Metro Manila iti panggep a maiyasideg ti COVID-19 booster shots iti publiko babaen iti panangpabalin kadagiti drugstores kas vaccination sites para iti booster jabs.
Innayonna a maipatungpal ti Resbakuna sa Botika iti dadduma pay a paset ti pagilian kalpasan ti panagballigi ti naisayangkat a pilot test para iti daytoy.
