Pinagyamanan ni President Ferdinand Marcos Jr. idi kalman ni Prime Minister Anwar Ibrahim gapu iti tulongda iti Pilipinas nangruna dagiti biktima iti naglabas a Severe Tropical Storm Kristine.

Daytoy ket babaen ti panagsaritada iti telepono.

Sigun kenni President Marcos Jr., ti suporta ti nasao a pagilian ket nakadanon kadagiti pamilia a naapektaran ti bagyo nangruna dagiti narigat a madanonan ti tulong.

Ti Malaysia ket karaman iti pagilian iti Southeast Asia a nangideploy ti air assets tapno mangipaay iti tulong kadagiti lugar a naapektaran ti bagyo.

Ti dadduma pay a pagilian a nangipaay ti tulong ket ti Indonesia, Singapore, ken Brunei.

Agarup dua a milion a pamilia ti naapektaran ti bagyo a Kristine ken ti kaudian a bagyo a Leon iti sangapulo ket pito a rehion ken walo pulo ket dua a probinsia, kas maibasar iti datos ti National Disaster Risk Reduction and Management Council.