Maal-allukoy ti publiko a makipaset iti maipatungpal a maika-dua a Nationwide Simultaneous Earthquake Drill ita nga aldaw, alas dos ti malem.
Iti panakiuman ti Bombo Radyo kenni Frankie Cortez, Chief Operations Section ti Office of the Civil Defense – Cordillera, amin dagiti 83 a local government units (LGUs) iti rehiyon ket “maximum” ti partisipasyonda iti eartquake drill kas panangsagana iti “The Big One,” ti posible a magnitude 7.2 a gingined nga itunda ti panaggaraw ti West Valley Fault.
Sigun kenni Cortez, in-inut a ngumatngato ti partisipasyon dagiti umili iti rehiyon nu idilig idi napalpalabas a naisayangkat nga earthquake drill nangruna kadagiti probinsiya.
Ti nasao a panagbalbaliw ket kalpasan ti napasamak a magnitude 7.0 a gingined idi Hulyo 27, 2022 nu sadino ti epicenter ket idiay Abra.
Impeksa met ni Cortez nga umdas ti plano ti Office of the Civil Defense-Cordillera ken Cordillera Regional Disaster Risk Reduction and Management Council (RDRRMC) iti kanito a mapasamak ti “The Big One” agsipud ta addaan dagitoy iti clearing operations, umdas nga inventory kadagiti resources ken daduma pay.
Kabayatanna, manamnama a rinibribo nga indibidual ti makipaset iti nasao a drill iti rehiyon Cordillera.//Bombo Mera Pacpacan
