BAGUIO CITY – Mailukat nga umuna kadagiti residente ti Benguet dagiti tourism spots ti probinsia sakbay a mailukat dagitoy kadagiti sangaili ken turista manipud iti ruar ti Benguet.
Inwaragawag daytoy ni Governor Melchor Diclas kasaruno ti panagplano ti Baguio a panakailukat ti turismo ti siudad kadagiti turista inton Setyembre.
Kinunana a nasken met a pagsaganaan ti Benguet dagiti turista nga agturong sadiay manipud kadagiti turista a mapalubusan nga agturong iti Baguio City.
Innayonna a nasken nga adda ti koordinasyon ti Baguio City ken ti La Trinidad, Itogon, Sablan, Tuba ken Tublay (LISTT).
Inyunay-unayna met a dagiti turista a mapalubusan nga agturong iti probinsia ket nasken nga addaan ti reservations sakbay ti panagsangpetda iti nagduduma a tourism areas ti Benguet.
Immunan a dinakamatna nga ipimpinalen dagiti tourism officers dagiti munisipyo ti Benguet dagiti programa, plano ken proyekto dagitoy para iti sektor ti turismo.
