BAGUIO CITY–Dakkel a parikut ti lokal a gobyerno ti La Trinidad, Benguet ti saan a panangisardeng ti maysa a residente ti Obulan, Bekkel iti iligal a panagkali daytoy iti lote iti nasao a lugar.
Inaklon daytoy ni Mayor Romeo Salda iti panakiyuman ti Bombo Radyo Baguio.
Sigun kenkuana, nabayagen ken nagtutuon ti naipaulog a cease and desist order kontra iti managan Oscar Dodon gapu iti iligal a panagkali daytoy kadagiti saanna a sakop lote.
Dinakamatna nga ado metten kadagiti nagreklamo a kaaduanna ket kabagyan ni Dodon ti nangipila iti kaskenan a kaso iti korte kontra iti nasao nga indibidual.
Kinunana nga adun a daras a kinomprontar dagiti otoridad ni Dodon ngem saan latta daytoy a simmardeng nga agkali kadagiti lote.
Sigun kenni Mayor Salda, karaman kadagiti lote a kinali ti nasao nga indibidual ket masakupan ti Department of Public Ways and Highways – Cordillera.
Immuna iti daytoy, nagreklamo ditoy Bombo Radyo Baguio ti mays a maseknan nga indibidual gapu iti panangiyalis ni Dodon iti danom iti kanal ti maysa a balay sadiay Beckel a mangituntunda iti risgo nangruna ita a panagtutudo.
Maipalagip a naireklamo metlaeng ni Dodon idi napalpabalas a tawen gapu iti panagtarakena iti baboy iti nasao a lugar iti baet a residential area daytoy.
Inyunay-unay met pay ni Mayor Salda a nasken a dumalan latta iti umno a proseso ti kaso ni Dodon tapno nalinteg ti maipataw a pannusa iti daytoy.**
