BAGUIO CITY – Nangipasa ti lokal a konseho ti Baguio iti maysa a resolusyon a mangkidkiddaw iti saan pay a pannakaipaima ti kontrata iti nangabak a kontraktor ti Phase 1 ti mapangpanggep a panakaimuntar ti bicycle lanes iti nagduduma a paset ti siudad.
Daytoy ket kalpasan a naduktalan ti konseho a saan a naikonsidera dagiti pagalagadan ti Department of Public Works and Highways (DPWH) iti pannakaisagana ti plano para iti nasao a proyekto.
Malaksid iti daytoy, nakwestunaran ti saan a panangipatungpal ti City Engineerings Office iti pannagadal tapno maipasigurado ti kinatalged dagiti siklista ken dagiti motorista iti kanito a maipatungpal ti proyekto.
Sigun kenni Vice Mayor Faustino Olowan, nasken a maitunos iti pagalagadan iti DPWH ti panangbukel ti City Engineerings Office iti plano.
Maipalagip a siyam a ruta ti binigbig ti CEI a pakaimuntaran ti nasao a bike lane a pakairaman ti City Hall-Legarda Road-Marcos Highway, City hall Harrison Road-Kalaw-Baguio Convention Center, Harrison Road-Bonifacio-Manuel Roxas, Loakan-Apugan-Panagbenga Park-North Drive, Panagbenga Park-BGH Rotunda, Governor Pack Road-BGH Rotunda nga agserbi kas primary bika lane.
Nabigbig met ti Ambiong, La Trinidad, Marcos Highway, Loakan, Itogon, Sablan, Tuba ken Tublay kas secondary bike lanes. (with Bombo Brigit Marcasi)
