BAGUIO CITY–Inaprubaran ti Sanguniang Bayan ti La Trinidad, Benguet ti resolusion a mangilaylayon iti 60 nga aldaw a pawayway kadagiti settler a nangukupar iti paset ti Military Reservation sadiay Camp Badeo Dangwa, La Trinidad, Benguet.
Sigun kenni Councilor Guiller Galwan, proponent ti resolusion, daytoy ket tapno maipaayan iti gundaway dagiti settlers nga agsapol iti pagakaranda.
Kinuna a mismo a kiniddaw dagiti settlers ti nasao a pawayway iti Police Regional Office Cordillera (PRO-COR) nangruna ita a panawen ti krisis nga intunda ti pandemia.
Maipalagip a nangipaulong ti PROCOR iti NOTICE TO VACATE kadagiti agarop 180 a settlers gaputa aramaten ti pulisya ti espasyo iti nasao a lote.
Impasigurado met ti Cordillera PNP nga awan ti mapasamak a demolisyon ngem ketdi gatangenda kadagiti settlers dagiti naipasdek nga istruktura kas paset ti kompensasyon gaputa ti nasao a disso ket paset ti Enhancemnent Capability Development Plan ti kampo. (with Bombo Florence Paytocan)
