BAGUIO CITY–Adalen a naimbag ni Mayor Mauricio Domogan ti resolusion nga inaprobaran ti City Council para iti temporario a pannakasuspindir ti curfew hours kadagiti balay-paginuman ditoy siudad.
Sigun iti mayor, nasken a mabalanse ti tunggal sitwasion iti nasao a singasing ti konseho tapno awan ti agbalin a dakes nga epekto daytoy iti siudad.
Kinuna ti mayor a ti nasao a resolusion ket para iti pannakaamyendar ti agdama a curfew ordinance ti siudad para kadagiti balay-paginuman.
Maipalagip nga iti pannakipatang ti Bombo Radyo-Baguio ken ni Vice Mayor Edison Bilog ket kinunana a ti laengen pirma ti mayor ti maur-uray sakbay a naan-anay a maipatungpal ti resolusion.
Immunan nga ingkalintegan ti bise-mayor ti pannakaaprobar ti nasao a resolusion iti City Council ken kinunana a daytoy ket tapno makasubbot dagiti agtagikua kadagiti balay-paginuman manipud iti pannakalugi dagitoy gapu iti nainget a panangiyemplementar ti pulisya iti curfew ordinance.
Sigun ken ni Bilog, apaman a pirmaan ni Mayor Domogan ti resolusion ket mapalubusan ti agtultuloy nga operasion dagiti bar manipud ita a bulan agingga inton Mayo 31 ti agdama a tawen.
