BAGUIO CITY – Adda itan iti Senado ti gakat para iti panakanayon ti bed capacity ti Baguio General Hospital and Medical Center (BGHMC).
Iti panakiyuman ti Bombo Radyo kenni Baguio City Representative Mark Go, impannakkelna nga idi Martes ket inaprobaranen ti Kamara iti maikatlo ken maudi a panagbasa ti resolusyonna para iti nasao a banag.
Kinunana a manipud iti agdama a 500 a bed capacity ti BGHMC ket manayonan to daytoy iti 300 ken agbalin nga 800 ti bed capacity ti pagagasan apaman nga aprobaran ti presidente ti resolusyon.
Dinakamatna a kasarsaritana ni Sen. JV Ejercito, chair ti Committee on Health iti Senado para iti panakaipasa ti nasao a resolusyon sadiay tapnu pirmaanen daytoy ti presidente.
Sigun iti kongresista, panggep ti resolusyon a manayonan ti imprastraktura ti BGHMC, dagiti pasilidad daytoy ken dagiti personnel a pakairamanan dagiti doktor ken nars tapnu ad-adda a sumayaat ti serbisyo a maipaay iti publiko.
