Paim-imbestigaran ita ti Department of Environment and Natural Resources ti viral resort a naipasdek iti sentro ti Chocolate Hills idiay Bohol.
Kasaruno daytoy ti nagwaras a video a mangipakpakita iti Chocolate Hills a maysa kadagiti nairaman iti 8 wonders of the world ken ti resort nga adda iti sentrona.
Nakaawat met iti negatibo a reaksyon manipud iti publiko ken kadagiti sumagmamano a senador ti nakita a resort.
Iti official statement ti Department of Environment and Natural Resources, imbutaktakda nga idi pay Setyembre 3, 2023 a nangipaulogda ti Temporary Restraining Order iti nasao a resort a naawagan kas Captain’s Peak Resort.
Malaksid iti daytoy, nangiruar metlaeng ti ahensiya ti Notice of Violation kontra iti nasao a project proponent idi Enero 22, 2024 gapu iti panag-operate daytoy nga awanan ti Environmental Compliance Certificate.
Gapu iti daytoy, binilin ni Regional Executive Director Paquito Melicor ni Provincial Environment and Natural Resources Officer Ariel Rica a mangbukkel ti maysa a grupo a mangipatungpal ti imbestigasyon iti Captain’s Peak tapno maduktalan nu nagtulnog dagitoy iti Temporary Closure Order a naipataw kadakuada.
Ti Chocolate Hills idiay Bohol ket naideklara kas protected area idi July 1, 1997 iti sidong ti Proclamation No. 1037 nga impaulog ni sigud a President Fidel Ramos.
Daytoy ti nangideklara iti Chocolate Hills kas maysa a National Geological Monument ken maysa a Protected Landscape.
Panggep ti deklarasyon nga ipreserba ti iconic landscape daytoy kagiddan ti pannakaital-o ti sustainable tourism ken ti pannakasalwad ti biodiversity ken environmental integrity ti nasao a lugar.
